- Dette var ein konkurranse som passa perfekt for sunnfjordingar!, ler Rune Støfring (25) frå Jølster.

Han og lagkamerat Sindre Hoff frå Gaular vann konkurransen "Multisport", som vart arrangert av festivalen Vinjerock i Jotunheimen i helga. Dei slo omlag 90 påmelde lag i fleire klassar.

Ellevilt

- Det var både mjølkespann-kasting, elvesurfing og klatrekonkurransar, så dette passa oss sunnfjordingar perfekt, fortel Støfring.

Laget, som gjekk under namnet "Reven og Hoffebassen", meiner dei fekk testa både koordinasjonsferdigheiter, samarbeidsevner og løpsstyrke under konkurransen.

- Det verste var å dette i den iskalde elva i det vi forsøkte å forsere ein stokk som låg på tvers frå breidde til breidde, det var bra kaldt! smiler Støfring.