Den 24 år gamle kvinna som døydde av skadene ho fekk under ein brann i ei leilegheit i Førde måndag, var sjølv brannstiftar.

• BAKGRUNN: Brannoffera døydde av skadene

- Etter alt å dømme vil vi konkludere med at brannen har vorte påsett inne på det rommet der mor og barnet vart funne, seier Førde-lensmann Jan Egil Tvinde i ei pressemelding.

Også 24-åringen sin 20 månader gamle son omkom som følgje av skadene han fekk i brannen.

Kjenner ikkje motivet

- Ut frå funna i etterforskinga vår så langt, ser vi det som sannsynleg at det var mor sjølv som var brannstiftar. Det er samsvar mellom den taktiske og tekniske etterforskinga som gjev oss grunnlag for å seie dette, forklarer Tvinde.

Han fortel at politiet til no har konsentrert etterforskinga fullt og heilt om kva som faktisk har skjedd. Eventuelt motiv er enno ikkje klarlagt.

Vart funne medvitslause

Politiet fekk melding om brannen klokka 15.38 måndag ettermiddag. Då brannmannskapa ankom staden var både kvinna og barnet alt redda ut av bygningen av heltemodige naboar.

Naboane fann begge dei to hardt skadde liggjande medvitslause i ei av leilegheitene i Mølletunet, ein bygning som i alt husa 27 asylsøkjarar frå ulike land.

Det viste seg raskt at dei to hadde alvorlege brannskader og via Førde sentralsjukehus vart dei raskt overført til brannskadeavsnittet ved intensivavdelinga på Haukeland universitetssjukehus i Bergen, kor dei begge seinare døydde, høvesvis tysdag kveld og onsdag morgon.