Ekstremvêr er uvêr så kraftige at vinden, nedbøren, vasstanden eller snøskredfaren vert så stor at liv og verdiar kan gå tapt.

• SJÅ HERJINGANE TIL DAGMAR: Uvêrsdøgnet i bilete

«Agnar» var først

Sidan 1995 har ekstremvêra i Norge fått namn, og aller først ut var Agnar. Han kom inn som ein sterk storm over Nordmøre og Trøndelag 12. oktober.

Talet på ekstremvêr varierar. I 2010 hadde vi berre eit, i 2009 ingen, men heile fem i 2008. Berit var det første i 2011, og fekk seinare følgje av kjendisane Cato og Dagmar første juledag.

Alle skal vite

Det er Meteorologisk institutt på Blindern i Oslo som har fått ansvaret med å setje merkelappen ekstremvêr på uvêra, og det er dei som bestemmer namna, skriv storm.no.

Tanken bak er at når uvêret har fått namn skal både politi, beredskapsavdelingar, media og folk i dei utsette områda vite kva vêrhending det er snakk om.

Annankvar

Namna følgjer alfabetet, og annankvart uvêr får gutenamn, og annankvart jentenamn. Unntaket er namn som startar på Q, W, X, Z, Æ, Ø og Å, desse får ikkje ekstremvêr oppkalla etter seg.

Meteorologisk institutt har til ei kvar tid lister med namn frå A til Y klare, men insisterer på å halde den hemmelig.

– Vi må jo prøve å unngå at media spekulerar, og halde på spenninga, seier statsmeteorolog Bjart Eriksen til yr.no.

• SJÅ HERJINGANE TIL DAGMAR: Uvêrsdøgnet i bilete

Norske namn i Sverige

Tropiske syklonar har fått namn lenge, og her i Norge er det ikkje uvanleg at vi brukar namna deira om restane etter uvêra når opp til oss.

Storbritannia og Danmark gir ikkje ekstremvêra namn, medan Sverige på si side brukar dei norske namna på uvêr som har fått namn hos oss.

– Også Tyskland gir ekstremvêr namn, fortel Storm-meteorolog Roar Hansen til storm.no.