– Vi treng ein representant i Helse Førde-styret som er kreativ og evnar å tenkje nytt. Det gjer ikkje Bente Frøyen Steindal!

Tilhøvet mellom tidlegare ordførar Bente Steindal, Ap, og Jacob Nødseth, H, har lenge vore mildt talt anstrengt.

I bystyret tysdag skapte Nødseth oppstuss då han forkynte kvifor han uansett ville nekte å stemme på den tidlegare Flora-ordføraren som kandidat til styret i Helse Førde, saman med ein annan kandidat, Kjartan Olafsson.

Refs

Utbrotet frå Nødseth fekk Frank Willy Djuvik, Frp, til å entre talarstolen og refse Høgre-representanten:

– Utspelet frå Nødseth er langt over streken for kva ein skal tillate av personkarakteristikkar i bystyret, og ordføraren burde ha brukt klubba, sa Djuvik, som minte Nødseth om at det er dei kvalifikasjonane Helse Førde er ute etter, ikkje kva eigenskapar Nødseth meiner kandidatane har eller bør ha, som til sjuande og sist er avgjerande.

Time-out

Kraftsalva frå Nødseth førte også til at Høgre sin gruppeleiar Hanne Kristensen bad om ein kort time-out før det vart votert. Olafsson sit kandidatur var samrøystes, medan Steindal vart vald mot Nødseth si eine stemme!