- Eg reknar med at dette kan bli ein real interessevekkjar for MC-faget, seier lærar ved VG2 køyretøy, Arvid Slåtten.

Han fortel at sjølv om dei er ei felleslinje for bil, lastebil og motorsykkel, så har hovudvekta stort sett lege på bil.

- Vi har mangla eit tilbod som dette. At vi no får ei slik gåve, saman med teknisk kursing er veldig positivt for skulen, seier Slåtten, som fortel at MC-opplæringa tidlegare ofte har vore på elevar sine eigne mopedar og lettmotorsyklar.

Toppmoderne syklar

No står både ein toppmoderne R-sykkel, og ein klassisk customsykkel i verkstaden, begge fulle av moderne teknologi. Og Slåtten er ikkje i tvil om at her er mykje å lære, også for lærarane.

-Det er klart at det er spennande for ein 17-åring å få jobbe med slike syklar, seier Stølen, som legg til at dette er maskiner dei neppe hadde fått midlar til å kjøpe inn frå fylkeskommunen.

Begge syklane er av merket Kawasaki, og den eine er verdas raskaste, serieproduserte motorsykkel, og sparkar frå med over 200 hestekrefter.

Roy Valvik, dagleg leiar i Norsk Motor Import, har sjølv utdanning frå køyretøylinja. Han såg at utstyret skulen hadde på motorsykkelfronten, var byrja å bli utdatert.

- Alt dei hadde innan MC-utstyr var ein gammal motor frå då MC-senteret brann ned. Den motoren var heller ikkje i produksjon lengre, seier Valvik, som trur at det vil vere vanskeleg for elevane å bli interessert i motorsykkelmekanikk, når utvalet er så snevert.

- Mekanikk blir meir og meir avansert, og inneheld mykje elektronikk. For at utdanninga skulle henge med i tida, tenkte eg at dei måtte få skikkeleg utstyr på plass, seier motorsykkelimportøren.

Håpar på auka interesse

Valvik fortel at firmaet gir gåva også for bransjen sin del. Få mekanikarar utdannar seg innan motorsykkelfeltet, og Valvik trur at litt av grunnen har med materielltilbod ved skulane å gjere.

- Då eg sjølv gjekk på skulen, henta ein gamle bilar på skraphandelen, og skrudde på dei. I arbeidslivet er det ei heilt ny verd, der mykje ein ser er nytt. Vi håpar at dette kan gjere elevane litt meir rusta for kommande arbeidsoppgåver, seier Valvik.

Etterlengta tilbod

- Dette har vore etterlengta, fortel Merete Solheim (17).

Ho har ei stor interesse for motorsyklar, og har lenge sakna eit større utval ved skulen.

- Eg har alltid sagt at ei køyretøylinje burde ha eit utval av alle typar køyretøy vi kan jobbe med. Ikkje berre bilar, seier Merete, som fortel at det er bilmekanikk dei fleste tenkjer når dei høyrer om køyretøylinja ved skulen.

Når dei nye motorsyklane no er på plass, håpar ho at fleire vil opne auga for motorsyklar.

- Eg har tidlegare hatt sommarjobb ved NMI, og eg har verkeleg sakna å skru på syklar. At vi no får to slike syklar hit, er kjempekult, seier ho.

Jan Kjetil Herland (18) og Tor Erik Øybost (17), er også glade for at skulen har fått på plass moderne motorsyklar til å jobbe med.

- Det blir jo meir og meir elektronikk i bransjen. For oss blir dette ein ny verd vi møter meir i arbeidslivet, seier Øybost.