– Det er eit komplisert, og heller uvanleg stykke arbeid vi står framfor, seier Aril Hanekamhaug, prosjektleiar i Statens Vegvesen.

250 tonn gonger to

Eit digert kranskip starta i går forsøket med å få på plass dei to såkalla «utkragane» over Olsundet. Desse to stålkonstruksjonane, kvar med ei lengd på 56 meter og med ei vekt på 250 tonn, skal ut frå kvar si side av sundet. I løpet av første halvdel av juni skal midtseksjonen slepast opp frå Stavanger, og monterast saman med utstikkarane frå land.

– Denne midtseksjonen veg 600 tonn, opplyser Hanekamhaug. Som seier at når denne seksjonen er på plass, er dei to øyene fysisk knytt saman. For første gong i verdssoga vil det då vere teoretisk mogleg å gå tørrskodd frå Værlandet til Bulandet. Eller andre vegen.

Seks bruer

– Det er første gong i Norge, eller i verda for den saks skuld, at det vert bygd ein slik bru som no er i ferd med å komme på plass over Olsundet, seier prosjektleiaren. Det er sjølve brukonstruksjonen, ein sjølvberande stålbru utan annan forankring enn rampene på land, som er ny. I alle høve i slik målestokk det her er snakk om.

– Dette er mogleg å få til mellom anna fordi brua er laga med berre eit køyrefelt, noko som gjer konstruksjonen lettare en tofeltsbruer, opplyser Hanekamhaug.

Til saman seks bruer inngår i prosjektet som har fått namnet Fylkesveg 365 Bulandet-Værlandet. Samla sett vil bruspenna over Langøysundet, Olsundet, Brattholmen, Guriøyna, Ytre- og Indre Melværsund ha ei lengd på ein kilometer. Vegstrekket vil totalt verte like i overkant av 5000 meter.