Det var på skitur innover Fossheimsdalen at Årdal oppdaga jervespora. Jerven hadde følgt eit revespor på kryss og tvers nede i småskogen, såpass lågt som 400 meter over havet.

– Dyret hadde gått i området rundt kraftverksdammen. Vi fann også eldre jervespor, som utfrå veret dei siste dagane må ha vore to-tre dagar gamle, fortel Rune Årdal.

Fast tilhald?

Ifølgje Årdal er han slett ikkje åleine om å ha funne jervespor den siste tida. Også ved Kvannebakkbu skal det ha blitt sett spor etter mårdyret.

No trur han det er ei fare for at jerven enten har, eller er i ferd med å etablere seg fast i området.

– Du er sjølv sauebonde. Kva tankar gjer du deg no?

– Det gjer meg uroleg, heilt klart.

Treng hjelp

At det er jervespor det er snakk om, er Årdal ikkje i tvil om. Han var sjølv med på å spore jerv allereie i 1981. Jerven er såkalla sålegjengar og set store og svært karakteristiske spor etter seg i snøen.

–  Eg vil oppmode alle som skal i fjellet til påske om å ta med fotoapparat, slik at vi kan dokumentere og finne ut av korleis jervebestanden utviklar seg, seier Årdal.