Etter at valresultatet for kyrkjevalet i Bjørgvin bispedømme no er så å sei ferdig opptalde, er det klart at Ålfoten sokn i Bremanger kommune var blant dei ivrigaste til å røyste. Nærast like mange som ved kommunevalet. Her stemte seks av ti kyrkjemedlem – og oppslutninga landa på heile 58 prosent. Det skriv bt.no i dag.

Flytta soknepresten til Bergen
– Benkene er nok like tomme som i kyrkje flest hos oss på ein vanleg søndag. Men kyrkja betyr mykje for oss i lokalsamfunnet. Difor stiller vi sjølvsagt opp på valdagen, seier nyvalt medlem i soknerådet, Anne-Helene Taklo Myklebust til nettavisa.

– Det er tradisjon at mange stemmer ved kyrkjevalet hos oss, forklarar ho.

Engasjementet trur ho var ekstra stort i år, men at mange vart skuffa då kyrkjetoppane i Bjørgvin, trass mykje protestar, la ned soknepreststillinga i Ålfoten. Soknepresten vart flytta til ei stilling som kapellan i Loddefjord.

Ny rekord
Nokre sokn manglar framleis endelege resultat frå kyrkjevalet, men 90 prosent av røystene er no talt opp. Valet går over i historia, då oppslutninga for valet enda med 13,7 prosent. Dette er ein auke på 0,6 prosent, samanlikna med førre val for to år sidan.

Ifølgje bt.no finn ein dei slappaste kyrkjeveljarane i Sund. Her stemte ikkje meir enn fire prosent. Nyvalt soknerådsmedlem i Sund, Brynhild Enerhaug, trur forklaringa er lange avstandar mellom vallokalet til kyrkja og vallokalet til kommunevalet. Begge val vart gjennomført på same dag, måndag 12. september.