24 år gamle Leif- Harry Sunnarvik, Marius(20) og Arnt-Henning Seljeseth Osa i Eikefjord er frustrerte over det fylkeskommunale tilbodet «Trygt heim for ein 50-lapp».

Må gå eller punge ut

Gutane har valet mellom å punge ut 250 kroner i taxiutgifter eller gå 1,5 km i slapseføre nattetid for å komme seg heim etter ein bytur i Florø laurdagskveldar.

Årsaka er at taxisjåføren nektar å køyre lenger enn til Sørgardsfeltet, om lag 1,5 km frå Eikefjord sentrum, fortel eikefjordingen.

• Er det greitt å måtte gå 1,5 km og betale 250 kroner for tilbodet Trygt heim for ein 50-lapp? Sei di meining

For Sunnarvik og kameratane er det då framleis 1,5 km til dei er heime i Sunnarvik.

Heim for 50 kroner

Ungdommar i Flora kan i helgane komme seg heim ved å betale 50 kroner gjennom det fylkeskommunale tilbodet Trygt heim for ein 50- lapp. Turen går mellom anna til Eikefjord og vidare til Sørgardsfeltet, men der stoppar altså køyreturen. Ifølgje Sunnarvik seier sjåføren at taxien i utgangspunktet ikkje går lenger enn til Eikefjord sentrum, men likevel køyrer sjåføren til Sørgardsfeltet.

... men må betale 250 kroner

– Om vi vel å ta taxi heim når vi har komme hit, nullstiller sjåføren taksameteret. Då er startsummen 150 kroner om sjåføren skal køyre oss heim. I tillegg må vi betale 50 kroner for turen og 50 kroner for kva tilbodet eigentleg kostar, og då er vi oppe i 250 kroner, seier Sunnarvik.

- Må greie å gå 1,5 km, eller så får dei halde seg heime

Firda-lesar Steinar Eide er på si side djupt ueinig i at tilbodet ikkje fungerer.

- Om dei ikkje greier å gå 1,5 km får dei heller halde seg heime. I mi tid måtte vi gå fleirfaldige kilometer, så dette må dei greie. I dag er trenden at ungdommar skal få alt gratis opp i hendene, meiner Eide.

• Er du einig med Steinar Eide? Sei di meining

Fylkeskommunen vil ta opp saka med sjåførane

Eva Hamre i fylkeskommunen seier at dei vil ta opp saka med taxisjåførane, men at det ikkje er meininga at ungdommane skal bli køyrd heilt heim til ytterdøra.