– Læraren min meinte at eg ikkje kunne bli snikkar fordi eg er døv, seier Gøran Hovland. (21). No beviser han at det går med rette innstillinga.

- Treng ikkje høyre for å byggje hus

Frå han var liten, har ikkje Hovland (21) frå Flekke kunne høyre. Han bestemte seg likevel tidleg for at han ikkje ville la det stogge han i nå draumeyrket.

– Du treng ikkje kunne høyre for å byggje hus, seier Gøran Hovland engasjert gjennom døvetolken Astrid Steindal. Ho låner vekk øyre og stemme til Hovland under læretida hjå Norgeshus Naustdal Bygg AS.

Beviser at det går

Under utdanninga opplevde Hovland at ein lærar på døveskulen i Bergen meinte at han ikkje kunne verte snikkar fordi han ikkje høyrde.

– Dei sa det var for farleg, og at det ikkje gjekk. Men eg beviser det motsette. Dette går fint, seier Hovland og smiler.

– Eg har fått god kontakt med dei andre, og kan lese ein del på leppene, seier Hovland, som synest at dei andre arbeidarane i firmaet er flinke til å bruke eit tydeleg kroppsspråk.

Utfordrande, men kjekt

Ved Norgeshus Naustdal Bygg AS var dei ikkje i tvil om å ta imot Gøran Hovland som lærling.

– Eit handikap skal ikkje vere til hinder viss ein elev ønskjer å verte tømrar. Vi kan få handikap sjølve, seier Jan Erik Aase i Naustdal Bygg.

– Han er ein tøffing, seier Aase, medan rettleiar Anders Røyrvik nikkar.