Inntekta til norske bønder er uendra sidan 1978. Folk flest har auka lønna si med 60 prosent i denne perioden.

I 1978 var gjennomsnittsinntekta for bønder 180.000 kroner. Det er den framleis. I same tidsrom har den gjennomsnittlege inntekta i Noreg auka frå 270.000 til 440.000 kroner, skriv Nationen.

• Les også: – 16.000 færre bønder

Utrekningane er gjort av tidlegare forskar Svenn Arne Lie og viser, målt i 2009-kroner, at norske bønder i 1978 hadde 180.850 kroner i snittløn.

I 2009 henta kvart årsverk i jordbruket inn 178.521 kroner i vederlag til arbeid og eigenkapital.

Det høyrer med til historia at norske bønder aldri har hatt det betre i forhold til andre grupper i samfunnet enn i femårsperioden frå 1978 til 1982. Då låg vederlaget til arbeid og eigenkapital per årsverk på rundt to tredeler av snittløna i Noreg.