Skal askvollingane vurdere å støtte Nordic Mining sitt gruveprosjekt i Engebøfjellet, skal det krevjast noko tilbake.

Vil ikkje bestemme seg enno

Det var Ap-politikar Venke Nordeide klar på under Askvoll-folkemøte om det store gruveprosjektet onsdag kveld. Ho sa direkte til Nordic Mining-sjef Ivar Fossum:

– La oss sjå ein finansieringsplan for ålesundsbrua før vi bestemmer oss.

– No har vi sjansen

Sjølv om Nordeide ikkje fekk noko brulovnad på møtet, håpar ho at Fossum bringar beskjeden over til aksjonærane sine.

– Det er no vi har sjansen til å få brua, sa Ap-politikaren.

– Vi er positive til alle innspel, men første prioritet er å skape lønnsam næring, svarte Fossum.

Brua over Ålesundet skal binde Naustdal og Askvoll kommunar saman. Sundet ligg nært Kvammen i Askvoll og Russenes i Naustdal.

Folkemøte

Folkemøtet vart halde på Gjelsvik skule i Kvammen. Det var sjødeponiet som vekte mest skepsis.

– Eg er oppteken av arbeidsplassane. Det er fordelar og ulemper ved alt, sa Arne Håkon Grytten (22).

Systera, Kathrine Grytten (28), er skeptisk. Ho synest prosjektet vart framstilt noko roseraudt då dei hadde folkemøte for eitt år sidan.