Noregs Mållag følgjer opp kritikken Knut P. Bøyum retta mot Statens innkrevingssentral etter å ha motteke eit fartsførelegg på bokmål.

Tydeleg og klar

– Det viser seg at Statens innkrevingssentral sender ut alle krav på bokmål, og det har vi fått vite fordi Knut B. Bøyum var klar og tydeleg på rettane sine. Slikt er viktig for oss å få greie på, seier leiar Håvard B. Øvregård og set saka på dagsorden til neste styremøte i Noregs Mållag.

Usaklege debattinnlegg

Knut B. Bøyum nekta å betale fartsbota fordi den var utsend på bokmål. I Firda fortalde han, med glimt i auga, kva nedtur det var å få den første fartsbota etter 25 år som bilist, på feil målform.

Les også: Nektar å betale fartsbot på bokmål og Blir fotgjengar etter råkøyring

Avisoppslaget utløyste massevis av debatt på ulike nedsider, med til dels svært usaklege innlegg retta mot nynorsk generelt og Knut P. Bøyum spesielt. Firda-redaktøren måtte å fjerne eitt innlegg og grov utskjelling i andre.

Meir respektert enn før

– Er debatten uttrykk for eit gryande nynorskhat?

– Nei, nynorsk og dialektar er meir godtekne og respekterte enn nokon gong før, seier Øvregård.