Laurdag heldt Arnt-Johnny Alme og kjærasten Stine Kvamme open gard i Jarbu på Sandane. I tillegg til dyktige bogeskyttarar og eit forrykande hesteshow, fekk dei vel hundre frammøtte også sjå opninga av den einaste Kassai-bana i sitt slag her i landet.

Byggjehjelp frå Ungarn

– Vi har hatt besøk av to brør frå Ungarn, Daniel og Zsolt Daróczi, som har hjelpt oss med å få laga bana slik at den stettar måla til Kassai Kansag, fortel Alme om den 99 meter lange bana som ryttarane brukar når dei i dundrande galopp skal skyte tre til tolv piler mot ein roterande blink på under 20 sekund.

– Det er viktig at bana er heilt i vater. Difor har vi både lagt inn drensrøyr og nytta laser i arbeidet, seier Alme, og fortel at medlemene av bogeklubben har brukt ledige kveldar og helgar i halvanna månad for å verte ferdig med bana til showet på laurdag.

– Det som har kosta mest er tida, seier Alme.

– Det har vore eit hardt arbeid å byggje bana, men no er den klar og den er like god som banene i Ungarn, seier Zsolt Dároczi, som gjerne kjem att til Gloppen for å konkurrere på internasjonalt nivå.

Håper på internasjonale tevlingar

– Det at vi har fått til denne bana, betyr mykje for oss som klubb. Planen til neste år er at vi skal halde ein internasjonal konkurranse, fortel Alme, som håper å trekkje til seg utøvarar frå Canada, Austerrike og Ungarn til New Zealand.

Med bana i orden, er det berre ein ting som manglar;

– For å vere ein fullverdig klubb som kan delta i dei internasjonale kassaikonkurransane, må vi vere ti medlemer, seier Alme, som førebels manglar dei siste to.

Han håper likevel at dei skal komme i hamn med rekruttering og opptrening i god tid før sommaren.

Også medlemene i Kassai-klubben i Gloppen gler seg stort over at Alme har investert i den nye bana.

– Det at vi no får ei bane som vi kan trene på og bli gode i, har mykje å seie for oss som er medlem i klubben, seier Elling Hauge.

– Det blir kjekt å ta den nye bana i bruk, synest Elise Øygard (18).