Eit distriktsbarometer publisert av Nationen viser at 36 prosent er villige til å betale meir for maten dersom det er nødvendig for å oppretthalde norsk landbruk.

Det er ein svak auke i forhold til i fjor, og gruppa som ikkje er villige til å betale meir er i same periode redusert til 17 frå 26 prosent. Nesten halvparten av dei spurte er verken samde eller usamde i at dei er villige til å betale meir.

Viktig næring
Henrik Solbu er konstituert administrerande direktør i Stiftelsen KSL Matmerk, og har som føremål å skape preferanse for norskprodusert mat. Han meiner det er mange gode grunnar til å kjøpe norsk mat heller enn å kun sjå på pris.

- Vi har ein matproduksjon i Norge, og den ønskjer vi å oppretthalde. Det er ei viktig næring, og det er viktig at dei norske forbrukarane kjøper den norske maten, seier han til Nationen.

Solbu påpeikar at omsetning av norsk mat også har positive ringverknader.

- Vi har ein spreidd matproduksjon, som igjen bidreg til å oppretthalde kulturlandskapet. Det er viktig også for andre næringar, slik som turisme, seier han, og legg til at norsk mat også har høg objektiv kvalitet.

Finanskrisa
Årsakene til at folk er meir positive til å betale meir for maten dersom det er nødvendig for å oppretthalde norsk landbruk ønskjer Solbu ikkje å spekulere så mykje i, men han trur det kan vere ein kombinasjon av økonomi og marknadsføring.

- No som verknadene av finanskrisa forsvinn, er det kanskje fleire som er villige til å betale meir. Det kan og vere at ein del marknadsføring, slik som Nyt Norge kan ha påverka forbrukarane. Det er uansett positivt at det er ei forbetring, seier Solbu.

Er du villig til å betale meir for maten for å oppretthalde norsk landbruk? Diskuter i kommentarfeltet.