I fjor fekk Noreg strykkarakter i dyrevelferd frå EU. Noreg er ikkje betre enn andre land, meiner veterinær.

– I rapporten frå EU gjekk kritikken både på transport til slakteri, dyrlegar som ikkje greip inn og utbrente bønder, seier Hanne Martine Stabursvik til Nationen.

Ho er veterinær med lang fartstid frå arbeid som inspektør og ekspert i dyrevelferdsspørsmål både i Noreg, EU og Latin-Amerika.

– Folk flest har eit nasjonalromantisk syn på dette med dyreetikk. Vi har høgverdige tankar om vår eigen matproduksjon, men sanninga er at vi ikkje er betre enn andre land, seier ho.

Ho meiner det er lenge sidan behovet til dyra var bestemmande og at det no er konkurranseprinsippet som gjeld.

– Maten skal framfor alt vere billig, og produsentane subsidierer konsumentane. Men billig er ikkje bra, seier Stabursvik. (©NPK)