Rådmannen i Førde går inn for å imøtekomme ein søknad om skjenkjeløyve på ein utekonsert, kalla Vårslepp 2010, på Festplassen i Førde 30. april.

1000 - 2000 menneske

Arrangørane Pikant, Rica Sunnfjord Hotell & Spa og Bada Bing ventar mellom 1000 og 2000 menneske, og vil ta i bruk mesteparten av Festplassen.

Hovudarena blir eit telt på 900 kvadratmeter som kan romme inntil 1200 personar.

Politisk avgjerd

Rådmannen skriv at Førde har hatt fleire utandørs arrangement med skjenkjeløyve dei seinare åra, men denne saka meiner han bør leggjast fram for politisk avgjerd.

For to år sidan avslo kommunen ein søknad om eit utandørs russetreff på Festplassen 30. april. Sosialtenesta meinte arrangementet var særs lite heldig utfrå ein alkoholpolitisk ståstad. Heller ikkje russen var positiv.

Til årets søknad har sosialtenesta ingen merknader, og politiet er positive til arrangementet. I tillegg har kommunen vore i kontakt med russen som ønskjer denne typen arrangement.

Tilrettelagt for russ

Rådmannen ser på årets søknad om skjenkjeløyve som eit tilrettelagt arrangement for russen.

- Utfrå erfaring veit vi at det samlast mykje russ i området denne kvelden, skriv rådmannen som er villig til å innvilge søknaden i år som ei prøveordning for denne typen arrangement.

For å nytte erfaringane til eventuelle seinare søknader, må arrangøren sende ein rapport i etterkant til Førde kommune.

18 - 35 år

Arrangørane skriv at dei ikkje ønskjer at fredag 30. april skal bli ein stor russefest, men russen vil sjølvsagt vere ein del av publikummet.

- Musikken vil vere variert, vi satsar på musikk som passar for både unge og litt eldre. Målgruppa vi vender oss til denne dagen er frå 18 til 35 år, skriv Odd Erik Gullaksen, direktør Rica Sunnfjord Hotell & Spa, Arild Vie, dagleg leiar Bada Bing, og Arne Øvrebø, dagleg leiar Pikant.