Dronning Sonja tek turen for å vere med under opningskonserten i Førdefestivalen torsdag 8. juli 2010.

Gler seg

–Dette er sjølvsagt ei svært hyggjeleg melding for oss, og vi ser med glede fram til å vere vertskap for Dronninga når ho kjem til Førde. Mange vil hugse at Dronninga vart forhindra frå sitt planlagde besøk på jubileumsfestivalen vår i 2009 av helsemessige årsaker, så det er ekstra kjekt å kunne ønskje H. M. Dronning Sonja velkommen tilbake til festivalen, seier direktør Hilde Bjørkum i ei pressemelding.

Les også: Festival med forfølgt musikk og Irsk suksessgruppe til Førde

H. M. Dronning Sonja er Førdefestivalen sin høge beskyttar, og vitja Førde for første gong då ho opna festivalen i 2004.

Fridom og undertrykking

Fridom og undertrykking er tema på årets festival, og opningskonserten blir ein festkveld der vi hyllar musikarar som ikkje let seg kneble, fortel Bjørkum i pressemeldinga.

– Vi feirar musikken si enorme kraft og overlevingsevne. Artistane som opptrer er Aurelio Martinez (Honduras), The Kamkars (Iran/Kurdistan), Kroke (Polen), Malouma (Mauritania), Amal Murkus (Israel/Palestina), Lars-Ánte Kuhmunen Band (Sverige/Sapmi) og London Uyghur Ensemble (Kina/Kirgisistan). Konferansier er Herborg Bryn.