Trass i kraftig nedbemanning, må skipsverftet i Florø permittere 20–25 tilsette, uvisst kor lenge.

– Vi får inn ein del dokk-jobbar, men det er førebels ikkje nok til å sysselsetje dei 50 operatørane vi har igjen, seier administrerande direktør Kjetil Bollestad ved STX Norway Florø AS.

Vanskeleg overgangsfase

Permitteringane er sette i verk medan verftet står ved ein skiljeveg. I morgon vert den siste kjemikalietankaren i serien på seks, «Stolt Breland», døypt i Florø, og måndag skal båten etter planen forlate verftet.

Les også: Slutt på skipsbygging i Florø

Dette skjer samstundes med at bedrifta er i ferd med å avslutte ei kraftig nedbemanning, frå over 300 eigne tilsette på topp til 60 i dag, der røyrleggjarar, maskinfolk, platearbeidarar og sveisarar utgjer kring 50 av dei som er igjen.

Lettare å få arbeid enn sist

Hovudtillitsvald Audun Grønnevik seier at det har vore ein krevjande oppseiingsprosess, der ein har prøvd å finne den rette balansen mellom krav til kompetanse, ansiennitet og alder.

– Sjølv om einskildpersonar naturlegvis er skuffa, har det ikkje vore mykje støy. Vi har hatt eit godt samarbeid med verkstadklubben, seier Bollestad.

Både direktøren og tillitsmannen meiner det har vore lettare å skaffe seg nytt arbeid no, i høve til 2003 då kring 600 vart oppsagde i Florø og Førde.

– Eg var ikkje her den gongen, men bortsett frå på verftet, er det god aktivitet i Florø for tida, seier Kjetil Bollestad.