Bjørn Harald Haugsvær meiner Kristeleg Folkeparti i framtida må finne rom for å inkludere homofile og muslimar i partiet.

- Mitt råd er å vise fram breidda i KrF. Berre på den måten kan vi einast om eit KrF i sentrum. I framtida må partiet finne rom for å inkludere homofile og andre som deler vårt verdigrunnlag, til dømes muslimar, sa Haugsvær under strategidebatten på helgas fylkesårsmøte på Skei.

Utspelet hans vart følgt opp av fylkesleiar Trude Brosvik, som meiner det er feil å stengje personar ute dersom dei ikkje aksepterer vedkjenningsparagrafen.

- Vi har ein føremålsparagraf i KrF, det bør vere godt nok. Det viktige er at dei tillitsvalde har lojalitet til grunnsynet i partiet og til den vedtekne politikken, sa Brosvik.

Dette vekte sterke reaksjonar hos fleire.

Signy Nyland påpeikte at trusvedkjenninga ligg der så lenge partiet heiter Kristeleg Folkeparti.

- Eit parti i strid med seg sjølv kan ikkje lykkast, sa veteranen Erlend Fagermoen.