Klokka åtte i dag vart det halde allmøte ved både Førde sentralsjukehus og lokalsjukehusa i Lærdal og på Nordfjordeid. Der presenterte leiinga i Helse Førde sitt framlegg til ny strategiplan for føretaket.

Planen legg etter det Firda har grunn til å tru opp til grunnleggjande endringar i sjukehusstrukturen. Truleg blir det lagt fram fleire alternativ. Eitt av desse kan ventast å gå ut på omlegging av dei to lokalsjukehusa i retning av distriktsmedisinske senter, med sterkare samling av spesialistfunksjonane ved Førde sentralsjukehus.

Statsråden

Klokka 10 startar etter planen dialogmøtet der statsråd Anne-Grethe Strøm-Erichsen (Ap) møter ordførarar og fylkespolitikarar frå heile fylket, og der også toppleiinga i Helse Vest blir til stades. Her blir strategien og omstillingstiltaka for Helse Førde hovudtema.

Første punkt på dagsorden er at statsråden skal snakke om omstilling og samhandling.

Klokka 10.30 presenterer styreleiar Clara Øberg og nestleiar Jorunn Ringstad Helse Førdes høyringsutkast til strategi og omstillingstiltak.

Ordførarane

Etter lunsj blir det ein og ein halv times dialogmøte med ordførarane i fylket, med KS-fylkesleiar Olav Lunden som møteleiar.

Deretter møter statsråden aksjonsgrupper som kjempar for høvesvis Nordfjord sjukehus, Lærdal sjukehus og Førde sentralsjukehus, før ho dreg til Førde sentralsjukehus for besøk og omvising.