Tore Klausen Aven (18) frå Askvoll, Oddgeir Muledal (17) frå Solheimsdalen, Dan Asp (17) frå Florø og Asbjørn G Klausen (16) frå Førde trur at det er mange som rusar seg med GHB her i fylket.

– Særleg skjer det på store festar og samankomstar som natt til 1. mai og liknande, meiner Tore.

Dei fire gutane som går på Øyrane vgs seier dei ikkje har høyrt så mykje om GHB. Likevel veit dei at stoffet er svært farleg.

– Vi har aldri blitt tilbydd GHB og vi veit ikkje konkret om nokon som har brukt det heller, fortel dei.

– Kvifor trur de då at stoffet er i ferd med å etablere seg blant dei unge her?

– Fordi det stadig kjem folk utanfrå til byen vår, særleg i samband med store arrangement og hendingar. I dag flyttar folk til Førde frå alle stader i landet, seier ungdommane.

Dei meiner det er naivt å tru at byen Førde ikkje vil oppleve dei same problema som andre byar har når det gjeld dop.

Dei trur det er sjølvsagt at det finst folk som driv med GHB og anna dop i Førde og elles i Sogn og Fjordane.

– Hasj er det mange som driv med.  I Florø er det meir utbredt med Ecstasy enn GHB, trur Dan.

Tore kan fortelje at han har fått tilbod om både hasj og ecstasy i Sunnfjord. Både han og dei andre meiner det er veldig lett å få tak i dop om ein ønskjer det.

Nei til dop¿

Gutane er alle einige om ein ting, dei seier nei til dop. Adjektiv som teit, dårleg og gale vert brukt for å skildre når vi spør kva dei tykkjer om å bruke narkotika.

– Det er ikkje nødvendig å dope seg for å ha det artig på fest, seier Asbjørn.

– Men faren er jo at nokon kan blande det i drikka vår utan at vi veit det, legg han til.

¿ men ja til alkohol

Men når det kjem til alkohol er protestane langt mindre blant gutane.

– Alkohol er heilt greitt, meiner dei alle, og fortel om drikkepress på skulen. Det er snakk om å drikke veldig ofte, seier gutane.

– Men presset kjem først og fremst frå eigne venner, meiner Oddgeir.