Får dei ikkje mogelegheit saman i lunsjpausen, tek dei eit bad kvar for seg om ettermiddagen.

– Eg er sikker på at det er sunt, seier Hilde.

Aldri sjuke
Kvar dag sidan byrjinga av september har dei tre damene bada i sjøen.

Dei hevdar bestemt at det ikkje er kaldt.
– Det er faktisk berre fint. Det følest ikkje kaldt i det heile, seier Magnhild.

Likevel er det kaldare no enn det har vore tidlegare.

– Ikkje sånn at vi kvir oss, men det er greitt å vere i rørsle ute i vatnet, seier Eirene.
Dei legg til at vatnet er kaldast i februar og mars. Temperaturen ligg på rundt 4 grader.

– Eg er overbevist om at dette er sunt. Tidlegare har eg vore litt giktisk, men etter at eg begynte med dette har eg vore heilt fin, seier Hilde.

– Dette er absolutt å anbefale. Eg føler meg meir opplagt enn før, og det er ikkje tvil om at det er ei herleg kjensle å komme opp av vatnet og kjenne blodet bruse i kroppen, seier Eirene.

Vilje og humør
Havfruene får Askvoll kosar seg i vatnet, og på veg opp for å finne kleda sine har dei ein liten snøballkrig. Latteren sit laust, og det er tydeleg at dette ikkje berre er kjekt, men også moro.

– Vi har det heilt flott. Dette er ein fin måte å nytte lunsjpausen på, seier Magnhild.

– Den dagen vi hugsar best er nok veslejulaftan. Då hadde vi raude nissehuer, og vi hadde med peparkaker og kosa oss, seier Eirene.

Kollegaene på Askvollheimen reagerer ulikt på dei tre fruene sine pauseaktivitetar.

– Nokre seier vi er galne, andre er litt misunnelege og seier dei godt kunne tenkt seg å vere med, seier damene.

Nokre har prøvd seg på å vere med, men det vart litt for kaldt for dei.

– Det er ikkje tida til å begynne no. Men for dei som vil vere med neste vinter er det berre å setje i gang frå sommaren av, seier Magnhild.

Og med det humøret og badegleda som desse tre damene utstrålar kan dei freiste nokon og ein kvar til å vere med.

HERLEG Hilde Haugland t.v. Eirene Bauge og Magnhild Fristad kosar seg med eit friskt bad i lunsjpausen i Askvoll.

BRUSANDE BLOD Vel på land etter dukkerten er det tid for påkledning. Det er ei fantastisk kjensle å kle på seg varme ullplagg og kjenne blodet bruse i kroppen etter eit bad seier Eirene Bauge. Ja og så tek badinga knekken på gikta seier Magnhild Fristad og Hilde Haugland.