Måndag kveld viste den humanitære aksjonen «Barna Først» at dei står bak Ilda (8) Atmana (16), Rabisa (18) og Jawana (14), som alle har fått avslag på asylsøknadene sine etter mange år i Førde.

Mange underskrifter

Dei frammøtte i kinosalen markerte engasjementet for dei fire jentene og alle andre asylborn i Norge gjennom den halvannan time lange støttemarkeringa.

Den nystarta aksjonen «Barna Først» krev at barna sine rettar skal komme i fremste rekkje når norske styresmakter vurderer asylsøknader.

Fire døme på at dette ikkje har blitt gjort, er asylsøkjarjentene i Førde, meiner aksjonsgruppa som også har mange andre med seg. For reaksjonane har vore sterke etter at jentene den siste tida har fått avslag på asylsøknadene sine, sjølv om dei har vore i Førde i mange år og er sterkt knytte til byen.

Fleire tusen støttespelarar

Og i Førdehuset var engasjementet stort: elevar frå Hafstad vgs., Mo og Jølster vgs. og Øyrane vgs. har samla inn 400 underskrifter i eit opprop om at Norge må følgje FN sin barnekonvensjon i asylspørsmål. Underskriftene skal leverast til statsministeren.

I tillegg hadde fire elevar frå skulane møtt fram for å halde appell. Det same gjorde Nils Gjerland, ordførar i Førde.

Margrethe Henden Aaraas leidde den nær fullsette kinosalen gjennom programmet som stod av appellar, danseinnslag, song og musikk.

Etterpå gjekk dei frammøtte i fakkeltog i Førde for å markere det brennande engasjementet.

I tillegg til at appellen frå aksjonsgruppa samla mange underskrifter i går kveld, har også Facebook-gruppa til aksjonen på kort tid samla 2027 medlemmer.