Haldningane til kraftutbygginga vart eitt av dei første tema under Sogn og Fjordane SVs årsmøte, som no går føre seg på Sandane.

Einar Gautefall (Jølster SV) protesterte i starten av årsmøtedebatten mot at fylkespartiet skal leggje seg på ei line som seier nei til alle utbygging.

– Småutbygging må vere både rett og viktig for å skaffe ny fornybar energi. Og kva vil SV jobbe for, når det gjeld fornybar energi. Vil vi jobbe for meir vindkraft, må vi seie det, sa Gautefall.

Åtvara

Carlo Aall i SVs fylkesstyre åtvara sterkt mot ei slik line:

– Ingen veit i dag kva som er summen av utbyggingspresset av småkraft. Det talar for stogg i slik utbygging, til vi veit kva vi driv med, sa han.

– Så lenge vi har ein politikk som ikkje gjer noko med forbruket, spring vi industrien og vekstfilosofiens ærend, dersom vi går inn for å byggje ut meir fornybar energi, sa Aall.

Også fylkespolitikar Norvall Nøringset markerte seg som skeptikar.

– Problemet er at det ikkje ligg føre nokon samla plan. Då får vi situasjonen der ein vil byggje ut dei finaste fossane, slik fleirtalet i fylkesutvalet gjekk inn for, mot røystene frå SV og Venstre, sa Nøringset.