Elevane på mellomsteget ved Fjærland skule har sjølve teke initiativ for å få rektor til skulen.

- I Fjærland har vi alt utanom folk. Her finst det jobb, hus til utleige, barnehageplass og masse aktivitetar for born og vaksne, skriv Anne Mari Mundal i 6. klasse, mens Kari Sunniva Waatevik lovar at alle vil bli tekne godt imot.

Leie av stadige skifte
Bakgrunnen for initiativet til elevane er at dei vanlege utlysingskanalane ikkje har gitt resultat. For etter to offisielle utlysingar er skulen framleis rektorlaus.

Skuledagen vert påverka av at det ikkje er rektor på skulen, og lærarar og vikarar må stadig steppe inn.

- Vi er leie av stadig skifte av lærarar og vikarar, seier Svein Kristian Restad til Sogn Avis.

Stillinga ved skulen er i utgangspunktet eit vikariat, og elevane meiner dette gir høve til å prøve ut kva ein synest om jobben og bygda.

Sikre på trivsel
Ein ting dei er heilt sikre på, er at eventuelle tilflyttarar vil trivast i bygda. Eit rikt organisasjonsliv for alle aldrar og sentral plassering med korte pendlaravstandar vert trekt fram av elevane.

- Vi har mykje som ikkje finst andre stader, til dømes bremuseet og bokbyen, seier Ingunn Supphellen.

Kontaktlærar for klassen Eivind Ødegård, som opphavleg er frå Valdres, er samd med elevane si skildring av bygda.

- Det er plass til nyskapande næringsliv her i bygda. Folk torer å tenkje annleis, og det er høgt under taket for nye idear. Det er ein av grunnane til at vi flytte hit. Mentaliteten og samhaldet her var noko som lokka oss, fortel Ødegård.