- Vi kan ikkje godta at Norge bryt FNs barnekonvensjon i asylsaker.

Det meiner ei gruppe unge og vaksne i Førde, som arrangerer ei støttemarkering i Førdehuset.

Avslag i Førde
Gruppa krev at norske styresmakter må ta omsyn til bornas rettar i samsvar med FNs barnekonvensjon, når dei vurderer asylsøknader, og viser til barnekonvensjonen sin del 1, artikkel 3, der det mellom anna står at barnets beste skal vere eit grunnleggande omsyn i alle handlingar som vedkjem barn.

Gruppa peikar på at det i Førde er fleire barn som den siste tida har fått avslag på asylsøknader, trass i at dei er etablerte i lokalsamfunnet og har ei sterk tilknyting til landet.

- Desse avgjerdene kan umogleg vere i samsvar med omsynet til barna sitt beste, meiner Førdegruppa.

Støttemarkeringa i Førdehuset blir skipa til måndag 15. februar, og mange vil delta med kulturinnslag i form av song, dans og opplesing.

Større aksjon
I tillegg blir det appellar med informasjon om den generelle stoda for mange asylsøkjarbarn i Norge i dag.

Det blir høve til å signere på eit generelt opprop til norske styresmakter, og på opprop som gjeld konkrete saker i Førde.

Etter markeringa blir alle invitert til å delta i fakkeltog gjennom byen.

Ifølgje gruppa er dette starten på ein generell aksjon som dei har gitt namnet «Barna først». Aksjonen blir i desse dagar kjent via internett på nettsida www.barna1.no.