Sokneprest Carsten Wind Hansen i Høyanger gir ammande mødre råd om å drikke litt vin før dåpen, slik at borna blir rolegare i kyrkja.

- Det viktige for meg er at folk får ei god oppleving under dåpen. Ein moglegheit då er at mor drikk litt alkohol og ammar barnet på førehand, seier Carsten Wind Hansen i Høyanger til VG i dag.

Kva synest du om rådet til soknepresten? Sei di meining i kommentarfeltet under artikkelen.

Han legg til at rådet kanskje er mest for foreldra sin del, for at dei ikkje skal vere nervøse og heller få ei god oppleving i kyrkja.

- Eg meiner sjølvsagt ikkje at ein skal drikke mange glas, men ein kan vurdere å drikke litt alkohol dagen i førevegen, seier soknepresten som kjem frå Danmark.

Han ser samstundes at rådet hans vert oppfatta som uvanleg å få frå ein prest, men etterlyser eit meir avslappa forhold til alkohol i Norge.

- I Danmark var det i gamle dagar vanleg at ein amma med litt alkohol for å roe borna. Dette er eit gammalt kjerringråd, som det nok er vanskelegare å følgje i Danmark enn i Norge, seier soknepresten, og fortel at han og kona sjølv har prøvd kjerringrådet med hell.

Legar som VG har vore i kontakt med er skeptiske til rådet frå presten, og det vert blant anna vist til at Helsedirektoratet har strenge tilrådingar om å unngå all alkohol før seks veker etter terminen.