– Eg vart ganske sjokkert då eg såg denne saka om eg skal vere ærleg, og mange som var på debatten har i dag tatt kontakt og sagt at dei synest det er synd at saka er til dei grader køyrt ut av dimensjonar.

"Grøftekantjournalistikk"

Dette skriv Anne Viken på kommentarfeltet på Origo-sona Fjordaglimt om dagens oppslagssak i Firda.

Les og sei di meining her: – Dundrande sure, kjipe og treige

Her skriv Firda om Viken som under eit debattmøte i Førde fredag gjekk hardt ut mot Senterpartiet, målrørsla og bunadseliten.

Men gaulværingen er alt anna enn nøgd med måten saka blir framstilt på. Ho kallar artikkelen for "grøftekantjournalistikk " og meiner det framstiller avisa som eit "nekmedie."

– Frå ein journalistisk ståstad ristar eg på hovudet. Det som kunne ha blitt ei interessant sak, har blitt tidenes mest tabloide. Forståeleg nok. Kven andre serverer slike sitat? Alle som kjenner meg veit at eg serverer slike sitat høgt og lågt i hytt og pine om alt og alle, det er ein talemåte som har komme på trykk, skriv Viken.

Meiner Viken må kutte ut personangrep

Utsegna har skapt debatt på Fjordaglimt. Her får ho både støtte og motbør frå fleire debattantar.

Sambygdingen Helge Kårstad meiner «tendensiøs “negativt” preik nyttar faktisk ikkje over tid», medan Aud Lunde på Sande, meiner Viken heller bør flytte heim og tilføre kompetanse. Medan ein annan debattant meiner Viken må kutte ut personangrepa ho driv.

- Smått forbanna

Men Mister Green, som han vel å kalle seg på Fjordaglimt, er på si side einig med Viken.

– No har eg lese litt på bloggen til Anne Viken og eg må sei at no er eg smått forbanna på Firda! Eg er så lei av journalistar/redaktørar som berre må forvrengje den verkelege historia, akkurat som om det er helt nødvendig for å selje aviser!? Skulle nesten tru at Se&Hør er det store forbildet" skriv Mister Green.

Anne Viken skriv også at ho er «dundrande lei av å bli mistyda og tolka i alle verdas villaste retningar, slik eg stadig blir» og at ho har eit saftig språk som ho har tenkt å halde fram med.