Ordførarane Bente Frøyen Steindal (Flora), Jarle Aarvoll (Sogndal) og Nils P. Støyva (Stryn) har sendt ein felles uttale til Sogn og Fjordane fylkeskommune ved fylkesordførar Nils R. Sandal.

Bakgrunnen for brevet er at Møre og Romsdal fylkeskommune vil selje sin eigardel i Fjord1 på 41 prosent.

Med bakgrunn i at Sogn og Fjordane fylkeskommune eig 59 prosent av selskapet, meiner dei tre ordførarane at det no må startast ein prosess der stillingar som vert ledige og kan flyttast frå Møre og Romsdal vert oppretta i Sogn og Fjordane.

- Det er då naturleg å styrke dei miljøa som allereie er i fylket, sjøsida i Florø og bussida i Stryn og Sogndal, skriv dei tre ordførarane, som også meiner Sogn og Fjordane fylkeskommune bør vurdere å kjøpe aksjane til Møre og Romsdal.

Ordførarane meiner det er spesielt viktig at sentrale leiarstillingar og kompetansestillingar framover vert lokalisert i Sogn og Fjordane.