Førde kommune har i den seinare tid motteke klager på at det ligg hestemøk på gang- og sykkelstiar i sentrumsområdet i byen.

Kommunen sender difor ut ei oppfordring til hesteeigarar og ryttarar om å vise omsyn.

Ingen reglar for bøter

Ferdsel i det offentlege rom tilseier at den einskilde pliktar å rydde etter seg, det vere seg boss, hunde- og hestemøk eller ting ein har med seg ut i naturen, påpeikar koordinator for miljøretta helsevern, Doris Rutledal.

I politivedtektene til Førde kommune heiter det at «eigar pliktar straks å fjerne ekskrement som hunden let etter seg».

Derimot er det ikkje innført reglar for bøter dersom nokon ikkje ryddar etter hesten, opplyser Rutledal.

- Burde ikkje vore eit problem

Ho reknar med at dei fleste irriterer seg over hestemøk på gang- og sykkelstiar, spesielt på våte- og mørke dagar der tilgrising av sykkel, klede og barnevogner vert eit problem.

Kommunen vil ta initiativ til eit oppslag som hesteeigarar og eigarar av gardsbruk kan nytte som oppmoding til dei som rir hestane i sentrumsnære område.

– Vi håpar dette kan vere løysing på noko som ikkje burde vere eit problem, skriv Doris Rutledal.