Fredag føremiddag vart det skote ein hjort med ei fiskenot vikla inn i geviret på øya Askrova i Flora. Hjorten har gått rundt med nota i geviret i minst eitt år.

• Her kan du sjå fleire bilete av hjorten.

Ti minutt etter jaktstart
- Allereie i fjor vart det observert ein hjortebukk med ei not i geviret her på øya. Men det var ingen som såg noko meir til bukken før han dukka opp på bøane igjen no i år, seier Henning Haugholt, som er med i jaktlaget på valdet Sunde.

Ingen i jaktlaget hans hadde sett hjorten i år, før den dukka opp på valdet deira fredag føremiddag.

- Ti minutt etter vi starta jakta var bukken skoten av Jens Anders Midtbø, seier Haugholt, som var med som drivar under dagens jakt.

Ekstra gevir i nota
Han fortel at det var fullt av fiskenot vikla inn i geviret til hjorten. I tillegg hang det eit ekstra gevir i nota.

- Vi trur det må vere geviret frå i fjor som hang igjen i nota, seier Haugholt.

Han fortel at dyret var magert og bar preg av at den ikkje har hatt det spesielt godt.

I stuss om geviret
Alle jegerane på Askrova hadde fått beskjed av viltforvaltar Magnus Frøyen om å skyte hjorten dersom dei kom over den for å spare den for vidare lidingar.

Haugholt fortel at geviret til hjorten hadde seks taggar, mens geviret som hang i nota hadde ti.

Det har fått jaktlaget til å lure på om det er ein returbukk dei har skote, eller om geviret kan stamme frå ein annan hjort som har vore i kamp med dyret som hadde nota i geviret.