Fredag føremiddag opplevde ei fortvila kvinne å bli låst fast på ein parkeringsplass i Førde sentrum. Då ho kom til bilen sin, oppdaga kvinna til sin store frustrasjon at ein annan bil stod parkert slik at det var umogleg for henne å komme seg ut.

- Kvinna kom fortvila inn i butikken der eg jobbar rundt klokka 10. Ho skulle berre gjere seg ferdig med julehandelen og komme seg heim igjen, men då ho kom ut til bilen var ho sperra heilt inne av ein annan bil, fortel ein firda.no-tipsar.

Ho legg til at det var mange ledige parkeringsplassar å velje mellom for den som hadde sperra bilen inne på parkeringsplassen.

- Det gjekk over ein halv time før kvinna fekk hjelp til å løyse problemet. Då kom det fire sterke menn som løfta bilen hennar i posisjon slik at ho kom seg inn i bilen og fekk rygga den ut av parkeringsplassen, seier firda.no-tipsaren.

Det høyrer også med til historia at eigaren av den andre bilen dukka opp like etter. Kva som vart sagt mellom dei to kvinnene veit ikkje firda.no-tipsaren.