Rundt 15 slektningar vart nyleg influensasjuke etter ei stor bursdagsfeiring.

– Mannen min og eg kjende oss sjuke etter å ha komme heim frå hotellopphaldet, men har ikkje testa oss. Vi er allereie på veg til å bli betre, seier Irene Nydal til Firda torsdag.

Det var etter 60-årsfeiringa til Nydal at fleire av gjestene kjende seg sjuke.

Sjukehusopphald

– Eine sonen vår fekk påvist svineinfluensa og vart innlagd på sjukehus i Førde i tre dagar, seier Nydal, som bur i bygda med same namn ved Holsavatnet.

Sonen vitja legen ved to høve, og fekk først beskjed om at det truleg var lungebetennelse. Ved andre legebesøk, vart han testa og innlagd ved sjukehuset.

Ni gjester testa

Til saman ni av bursdagsgjestene har i ettertid testa seg for svineinfluensa. Hittil har berre fem fått svar, der alle prøvene har påvist smitte.

– Nokre hadde feber, medan eg berre har vore slapp og hatt litt hoste, seier Nydal.

Ho meiner svineinfluensaen ikkje er så farleg som somme mistenkjer:

– Det kjem nok heilt an på kor godt rusta kroppen er. Eg har hatt influensa som har vore verre enn dette, avsluttar Irene Oddny Nydal.