15. juli fjerna flyselskapet Widerøe studentbilletten. Igjen står ein ungdomsbillett for dei mellom 12 og 25 år. Er du eldre, må du ty til vaksenbillett. Det skriv Firda i dag.

Les også:

• Studentrabatt lagar krøll i systemet til Widerøe
• 662 kr dyrare frå Førde enn frå Florø

– Eit sugerøyr

– Dette råkar studentar som i utgangspunktet har dårleg betalte deltidsjobbar og lite pengar. Ved dette kuttet set Widerøe eit sugerøyr i studentlommeboka, seier Torbjørn Vereide i Arbeidernes Ungdomsfylking (AUF).

Han karakteriserer billettfjerninga som diskriminering.

Diskriminerer

– Fordi Widerøe har flyavgangar ved små stader i fylket, råkar dette hovudsakleg distrikta. I tillegg råkar dette studentar, som bur langt heimefrå og er avhengig av å reise for å sjå venner og familie, seier fylkesleiaren.

Vereide er redd for at kuttet kan gje uheldige ringverknader.

– Dette er eit mottiltak når det er snakk om å få folk til å ta høgare utdanning, der dei må reise lengre avstandar.

Oppfordrar til protest

Vereide, som sjølv vert student til hausten, oppfordrar dei som kan om å velje DAT i Florø, framfor Widerøe i Førde.

– Når Widerøe vel vekk studentane, må dei rekne med at studentane vel vekk Widerøe.

– Men planlegg ein i god tid, er det ikkje snakk om store skilnader?

– Nokre har heilt klart sjansen til å planleggje nokre veker i førevegen. Men med deltidsjobbar der ein gjerne jobbar i helgane, kan det ofte vere vanskeleg å planleggje, meiner ungdomspolitikaren.

AUF ønskjer å setje saka på dagsorden, og håpar hovudpartiet vil støtte dei for å få tilbake studentbilletten.

Tilbake til start

Sjef for Danish Air Transport (DAT) meiner priskuttet til Widerøe gjer at det danske selskapet no er tilbake der dei starta:

– For seks år sidan starta Danish Air Transport (DAT) som einaste regionale fly med låge prisar. No er vi der igjen, seier DAT-sjef Jesper Rungholm og held fram:

– Vi har ingen planar om å heve prisane våre.