Det skriv avisa Firda i dag.

Utflytta måløyværing, Geir A. Midtgaard, reagerer sterkt på pengesystemet som Sande dansefestival brukar.

– Eg betalte ein hundrelapp for vin til 60 kroner, og fekk att 40 «tullepengar», og beskjed om at dei kunne vekslast tilbake på eit anna kontor, seier A. Midtgaard.

Informerte politiet

Dette er ein måte å tene pengar frå fulle folk, meiner han.

– Arrangøren satsar på at folk ikkje hugsar å veksle tilbake pengane. Systemet gjer at dei får harde kontantar inn, seier Midtgaard.

Då festivaldeltakaren karakteriserte systemet som svindel og på grensa til det ulovlege, fekk han beskjed av vekslingskontoret om å kontakte lensmannen. Og det gjorde han.

– Eg informerte politiet om at dansefestivalen brukar leikepengar. Men kva dei gjer med saka, er ein annan ting, seier måløyværingen.

– Kjem alltid attende

Arrangør, Per Kapstad, grunngir pengebruken med at festivalen vil unngå store mengder kontantar på området.

– «Danseskillingen» kan vekslast inn på Sande heile året, og har difor verdi heile året og held fram:

– Ein bong er derimot verdilaus etter festivalen. Her kan ein bruke danseskilling frå fire år tilbake, argumenterer han.

– Kva med dei som gløymer å veksle, og heller ikkje har tenkt seg tilbake?

– Har dei først vore på festivalen, kjem dei nok attende, seier Kapstad.

Deltakaren er derimot ikkje overtydd:

– Eg kjem ikkje til å gå på dansefestivalen fleire gongar. Det er i alle fall sikkert, avsluttar han.