Då ho plukka opp røyret og høyrde Norsk Tipping i andre enden, trudde ho ikkje sine eigne øyre:

– Nei no må du gi deg, dette veit eg ikkje om eg toler, var den umiddelbare reaksjonen til Totland.

Pengar til studiereise
Ifølgje ei pressemelding frå Norsk Tipping, veit den nybakte millionæren godt kva ho skal bruke pengane på:

– No skal eg hjelpe dottera mi som går på filosofistudiar. Ho skal til Aten på studietur, så dette vert moro for ho. Eg er så glad på hennar vegner. Eg skal òg kjøpe ny sofa, seier ho.

Var på ferie
Det var førstegevinsten på laurdag måløykvinna stakk av med. Ho var på ferie då den glade bodskapen kom over telefonlinja.

– Dette er den herlegaste beskjeden eg nokon gong har fått i løpet av ein ferie, seier ho og ler.

Ettersom Norsk Tipping ikkje fekk tak i vinnaren laurdag, var det ei datamaskin som sørgde for at Jokeren dukka opp på tv-skjermen.