Aktiviteten spesielt Ap-gruppa hadde på Facebook under debattane i fylkestinget tysdag og onsdag denne veka var eit påfallande og omdiskutert trekk under tingseta.

- Respektlaust
I lange periodar sat representantar med blikket på laptopskjermen og kommuniserte med kvarandre og venner i fjern og nær på Facebook. Dette skjedde rett framfor talarstolen der andre representantar framførte sine innlegg.

- Respektlaust. Vi er faktisk på jobb som folkevalde, seier Mari Andrea Ness (Sp) til Firda. Ho reagerte kraftig på Facebook-bruken.

- Vitaliserande
Ap-gruppeleiar og varaordførar Tor Bremer er fullstendig usamd.

- Facebook vitaliserer og gjer at fylkestinget ikkje lenger lever under ei osteklokke. Via Facebook og Origo får vi inn innspel og kommentarar, og vi kan leggje ut synspunkt, innlegg og avrøystingsresultat før sakene er ferdig behandla. Facebook i fylkestinget er definitivt komme for å bli, seier Bremer.

Sokkar som sig
Men ikkje alt Bremer føretok seg på Facebook under fylkestinget denne veka handla om politikk.

Noko av det som fekk Mari Andrea Ness til å reagere, var at Bremer under tingdebatten sette seg til å skrive om at noko av det mest irriterande i livet er sokkar som sig på leggene, og oppmoda vennene sine til å kommentere.

Fjerna raskt
Denne diskusjonen starta Bremer medan fylkestinget debatterte talen til fylkesordføraren, og han fekk raskt svar frå andre i Ap-gruppa på tinget.

Straks etter Firda intervjua Bremer om Facebook-bruken torsdag føremiddag, blir sokkesig-innlegga fjerna.