Det meiner Førde-borgar, Ståle Sørbotten, som no ber Førde kommune gjere ei opprydding i jungelen av «by»-ditt og «by»-datt som florerer på nybygg, nyanlegg og til og med faste installasjonar som har vore her i tiår.

Han er sterkt imot by-prefikset som er i ferd med å snike seg inn på stadnamn i Førde: Bymarka, Byfjellet, Bybrua, Byparken, Bystien...

Glad for festplassen

På det kommunale informasjonsskiltet om byggjearbeidet på den nye gangbrua til Festplassen har stadnamnet blitt Byparken. Difor er Sørbotten glad for at kommunalsjef Håkon Fimland slår fast at Festplassen skal behalde det gamle namnet.

– Festplassen er jo eit strålande namn som har vore brukt i årevis. Og alle som har budd i Førde ei tid, veit kvar den ligg. Kvifor surre med det, spør han.

Men Sørbotten meiner at også dei andre nyoppfinningane med by-prefiks som er på full fart inn, bør gjennomgåast av ein kommunal namnekomité, slik at offisielle namn kan fastsetjast ein gong for alltid.

Jordskiftedommar

Sørbotten uttalar seg som tilflytta Førde-borgar (ikkje byborgar). Som pensjonert jordskiftedommar har han likevel sett verdien av dei gamle stadnamna, kor viktige dei var for grenseoppgangar og nøyaktig lokalisering ute i terrenget. Ofte knyter dei seg til ei hending eller eit særtrekk ved terrenget.

Han tykkjer Førde kommune har vore eksemplarisk med å ta kartleggje og ta i bruk gamle stadnamn rundt om i bustadfelta. Slåttebakkane og Vieåsen sør med gatenamn som Ambrahamhjellen og Moldtaket er gode døme.

– Denne tradisjonen må kommunen vidareføre, og ikkje vere med på ei medvitslaus «by»-innføring. Eg kan ikkje tenkje meg at Brulands-karane og Hafstad-karane vil godta at Hafstad-fjellet blir kalla Byfjellet, held Sørbotten fram med eit smil.

Han foreslår at stien frå sentrum til toppen av Hafstadfjellet vert døypt for Fjellstien. Og at den såkalla bymarka ved Bekkjavatnet får Hunsrasta som offisielt namn, etter det mest sentrale punktet området.

– Samtidig må vi ta vare på lokalhistoria som dei andre namna i området representerer, oppfordrar Ståle Sørbotten.