– Vi har alltid lagt vekt på at profilen vår er å ikkje ha ein profil. Det tykkjer eg kjem godt til uttrykk også i år. Det viktigaste for oss er å lage eit sammensurium av gode opplevingar, seier ein entusiastisk festivalleiar, Per Øyvind Helle.

Det er sjette året FotballFlora vert arrangert, og tredje året konsertane går over tre dagar.

Vil ha dei beste lokale

På programmet finn vi, i tillegg til storprofilane Big Bang, Hellbillies, TNT og Boney M, også lokale, gode band.

– Eit medvite val i år var å få med dei beste banda i Sogn og Fjordane. Med The Generous Days, som vann Luttprisen i fylket i år, Pony the Pirate, som vann Årets Urørt på P3, og Håvard Lothe som snart gir ut si første studioplate, så er vi svært godt nøgde med den lokale profilen på festivalen, seier Helle.

Folkekjær

At dei også har drege til gards noko av det beste norsk rock kan by på, er han stolt av.

– Personleg meiner eg at Big Bang er det beste rockebandet i Norge for tida, El Caco er Norges beste hardrockband, samt at Hellbillies er eit av våre mest folkekjære band, seier Helle.

I fjor vart det selt omlag 3 500 konsertbillettar. Helle håpar på å selje mellom 4 000 og 4 500 i år.

– Vi reknar med fulle hus, og eg har tru på at programmet vil dra folk, seier Helle.

Han understrekar likevel at FotballFlora ikkje skal vekse inn i himmelen.

– Vi har ikkje noko mål om å bli superstore. Vi skal halde på den flotte festivalstemninga som vi er vorte kjende for, seier Helle.

Konsertbudsjettet er på 800 000 kroner, omlag det same som åra før.