Dei to verksemdene frå fylket fekk i ettermiddag overrekt handfaste teikn på anerkjenninga frå Norsk Designråd, for arbeidet dei kvar på sin kant har gjort for å skape seg ein ny visuell profil.

«Osar av truverde»

Den jølsterbaserte husflid- og suvenirbedrifta Audhild Viken AS er tildelt Prisen for god design for sin nye grafiske profil, som juryen seier «osar av truverde og høg kvalitet». Juryen meiner det er gjort ei fin kopling mellom det tradisjonelle og moderne i estetikken.

– Med omprofileringa si har Audhild Viken gitt suvenirsegmentet eit nytt uttrykk og forsterka formidlinga av norsk kultur og handverk, seier juryen.

Dagleg leiar i Audhild Viken AS, Harald Viken, tok mot prisen saman med broren og økonomisjefen Audun Viken.

– Vi ville utvikle ein profil som viser at vi er tufta på handverkstradisjonar, men samstundes framtidsretta. Det er kjekt å få ei slik anerkjenning, seier Harald Viken til firda.no.

Samanslegne selskap

Fiskeeksportøren Norway Pelagic har fått Merket for god design. Merket blir gitt til bedrifter og designarar som gjennom metodisk og målretta samarbeid har skapt svært gode designløysingar.

Selskapet oppstod då fem fiskeriselskap vart slegne saman for vel eitt år sidan. Etter samanslåinga måtte dei utvikle ein ny og felles profil.

Det nye selskapet, med hovudkontor i Måløy, er i dag verdas største produsent av sild, makrell og andre pelagiske fiskeslag til menneskeføde.