Det var fredag kveld at to jenter i 12-13-årsalderen slo alarm om at ein katt sat fast i eit tre på Ytre Hafstad i Førde. Katten hadde sitte fast i treet heile dagen, og fleire ungar i nabolaget hadde gjort fleire forsøk på å lokke katten ned. Det var tydelegvis ikkje viljen det stod på, men den sat rett og slett fast.

Stigen rakk ikkje opp

Då dei to jentene innsåg at her måtte det større tiltak til for å berge kjæledyret, ringde dei direkte til vakthavande ved Førde brannstasjon.

– I dette tilfellet kalla eg ut vaktlaget via telefon og ikkje radio. Det kunne blitt noko humoristisk, spøkjer brannsjef Bernhard Øberg.

Kort tid etter dukka brannvesenet opp med fem mann. Dei nølte ikkje med å få den lange stigen opp i treet.

Stigen var lang, men treet var samtidig høgt og dekt med greiner. Det resulterte i at den sprekaste av dei fem måtte klatre vidare frå stigen og opp i treet imens to mann stod lenger nede og gjenverande to sikra stigen.

Sjeldan oppdrag

– Aksjonen gjekk fint føre seg, og det er ei god erfaring, meiner Øberg.

– Vi kan jo komme opp i liknande situasjonar der menneske kan vere offeret.

Ifølgje brannsjefen er det ikkje ofte ein får slike oppdrag. Som oftast går det eit par år mellom kvar gong.