– Eg har hekla nytt sjal til deg, sa rektor på Naustdal barne- og ungdomsskule, Kirsten Friis.

- Så bra. Eg likar hekling skikkeleg godt, sa Torsheim, som let Friis leggje sjalet rundt skuldrane sine.

På det blodraude sjalet var det festa ein skorpion.

– Eg trur det er det einaste dyret du ikkje har med i kunsten din. Men du er jo skorpion, så difor vart det det, sa Friis.

– Ja, skorpionen sler ikkje, han stikk. Men skorpionar er dei verste å leve saman med, repliserte Torsheim med glimt i auga.

Finn ikkje ord

Han la ikkje skjul på at han var både audmjuk og svært takksam for all merksemda som vart han til del.

– Eg har rett og slett ikkje ord, sa Torsheim.

Naustdalshallen var stappfull, og vel så det, då sunnfjordingar samla seg for å hylle Sunnfjord-kunstnaren sin 70-årsdag laurdag.

Han fekk nyte over ein time med program sydd saman av elevar og born frå skulane og barnehagane i Naustdal.

Rikhaldig utstilling

Dei hadde funne inspirasjon i mange deler av Torsheim sin kunst som dei formidla til eit entusiastisk publikum.

Etter sceneinnslaga, kunne både Torsheim og dei andre gjestene nyte ei særs variert og rikhaldig kunstutstilling i regi av alle skuleelevane og barnehageborna.