– Det er til å gråte av. Vi er fortvila over at nokon må drive med slik tyleskap. Fotballmiljøet er lovleg forbanna no, seier leiar i fotballgruppa i Sandane Turn og Idrettslag, Jan Inge Erdal.

Spunne i ringar

Førre helg prøvde nokon å setje fyr på kunstgrasbana, samt stal og ramponerte ei plenrulle.

Denne helga har ein bilkøyrar køyrt tyl ute på kunstgrasbana og spunne rundt slik at deler av dekket er øydelagt.

– Brannskadene melde vi til politiet då vi hadde mistenkte i saka. Men skadene fekk vi ordna utan kostnad grunna grei produsent og då tenkte vi å forbigå saka i stillheit. Men no er det nok, seier Erdal.

Kjelder Firda har vore i kontakt med fortel om råne-sirklar på bana, og holer i dekket.

Ikkje sikra mot idiotar

– Bana går framleis an å bruke, men dette er skikkeleg surt. Bana er så ny at vi ikkje har fått tid til å sikre mot slike idiotar. Entreprenøren driv med siste avslutninga, deriblant å lage veg ned til bana. Denne har stort sett vore stengd heile tida, berre ikkje no i helga, seier Erdal med eit sukk.

Kor store kostnader det er snakk om, torer han ikkje spå.

– Vi har garanti på bana, så det er litt opp til leverandøren å bestemme kva vedlikehald som trengst for å fikse dette. Må vi ha profesjonelle frå Drammen eller Nederland er det klart det blir dyrt, seier Erdal.

Uhaldbart

Det ligg eit massivt arbeid bak det nye idrettsanlegget. Idrettslaget har kjøpt eit 30 mål stort areal, og den totale kostnaden er i dag på 10,7 millionar kroner. Av dette er 2,5 millionar tippemidlar, medan Gloppen kommune skal bidra med tre millionar i 2011/2012.

– Vi har prøvd å gjere noko for å gi organisert og uorganisert aktivitet ein plass å halde til, og vi ser at det virkar. Miljøet blomstrar. Men at nokon då må øydeleggje slik, er heilt uhaldbart. Fotballmiljøet på Sandane er lyn forbanna. Vi håpar dette miljøet seier ifrå, seier Erdal.

Han legg til at rykteflaumen er stor, og at nokon må stillast til ansvar for ugjerningane.

– Vi ber dei som veit noko, seie ifrå til oss, eller aller helst til politiet, seier Erdal.