HSF har inngått forpliktande samarbeid med Høgskolen i Bergen, Universitetet i Bergen og Høgskolen Stord/Haugesund.

Rektorane

Samarbeidet som får namnet Universitets- og høgskulenettet på Vestlandet (UH-nett Vest) er alt etablert med styre, administrasjon og budsjett, og styreleiar er rektor ved Universitetet i Bergen, Sigmund Grønmo.

Dei andre medlemmene av styret er rektorane ved dei respektive institusjonane.

Sekretariatet er lagt til Universitetet i Bergen, og det er tilsett administrativ koordinator i heil stilling.

Samarbeidet som no er i ferd med å komme på plass, er ein av fire modellar som rapporten til det omstridde Stjernø-utvalet for høgare utdanning har skissert.

Utan Møre

HSF-rektor Åse Løkeland avviser derimot at ein freistar å komme utvalet i forkjøpet, men legg ikkje skjul på at ein ønskjer å bevise at høgskulane har livets rett kvar for seg.

– Dette samarbeidet har vore under planlegging parallelt med Stjernø-utvalet sitt arbeid. Det starta opp hausten 2006 og gjekk då under nemninga Vestlandssamarbeidet. Det oppsto som ein følgje av at ein del av institusjonane i Vestnorsk Nettverk, som går frå Rogaland til Møre og Romsdal, ønskte å få meir kraft inn i arbeidet, seier rektoren til HSF si nettside.

No er likevel Møre og Romsdal ute av dansen.

– Det var fleire som såg at konkret samarbeid over eit så vidstrakt område som Vestnorsk Nettverk representerer, var vanskeleg å få til, seier Løkeland.

Skal motbevise

Stjernø-utvalet ser helst føre seg eit stort regionuniversitet i staden for nettverket som no blir etablert.

– Dette er det no opp til oss å gjere til skamme, seier Løkeland.

Forgjengaren hennar, Johs Thaule, er plukka ut til å vere pådrivar for UH-nettet internt i HSF.