Framstegspartiet, Venstre og SV i Flora ber Fylkesmannen vurdere lovlegskapen av at bystyrefleirtalet vil betale renter og avdrag på eit lån til den nye idrettshallen i byen. I tillegg løyvde bystyret fem millionar i støtte til Florø idrettssenter.

Desse pengane er ein del av eit ekstra kraftaksjeutbytte på ni millionar frå SFE.

Omgjekk lova?

Dei tre partia er sterkt imot denne pengebruken, som dei også meiner er ei omgåing av lovverket. Dei ber fylkesmannen vurdere om lånet må vurderast som tilskot, i strid med kommunelova og lov om offentlege innkjøp, viss kommunen skal betale både renter og avdrag på lånet dei har ytt til idrettshallen.

Etter kommunelova kan ikkje ein kommune gje lånte midler som tilskot til private verksemder, og viss Flora kommune har ytt samla direkte tilskot på 15 millionar til storhallen, vil meir enn halvparten av finansieringa har skjedd med direkte offentleg tilskot. Dette kan dermed også vere ei omgåing av lova om offentleg innkjøp, meiner dei tre partia.

15 millionar kroner

Brevet til Fylkesmannen, er underteikna av Bente Halvorsen, SV, Audun Hammerseth, Framstegspartiet og Elisabeth Norman frå Venstre, som også er varaordførar i kommunen.

Dei viser til den økonomiske situasjonen i Flora, og ber om at kravet om lovlegheitskontrol får oppsetjande verknad, fordi «fem millionar i tilskot og ti millionar som rentefritt lån ikkje er uvesentlege midlar, i den økonomisk situasjonen som Flora kommune er oppe i».

Storhallen i Florø vart realisert blant anna ved hjelp av ei pengegåve frå Trond Mohn.