Det var ei samling sinte og frustrerte tilsette og elevar som møtte fylkesrådmannens utsende på eit informasjonsmøte på Flora vidaregåande fredag.

Heilt til måndag denne veka har dei levd i trua på at skulen skal få sårt tiltrengt nybygg og betre inneklima i dei gamle bygga.

– Vi var veldig overraska då rektor informerte oss måndag. Vi har jo gjort alt klart til at arbeidet skulle ta til i haust. Blant anna har vi omdisponert rom, seier Bente Wøien, som er medlem i Utdanningsforbundet sin lokale klubb.

No kan Arbeidsstilsynet bli kopla inn.

– Vi har late vere å kontakte arbeidstilsynet, fordi vi har trudd at tilhøva skulle bli betre. Dersom framlegget frå fylkesadministrasjonen går gjennom, kan vi ikkje sitje stille lenger, sa Wøien under informasjonsmøtet, og hausta applaus frå kollegaene.

Elevrådet ved skulen gjekk denne veka ut i Firda og firda.no og åtvara mot aksjonar dersom ikkje fylkesrådmannen snur. Han vil utsetje oppussinga av skulen til 2015. Rehabiliteringa vil koste mellom 53 og 100 millionar kroner.