Torsdag la energi-og miljøkomiteen fram si innstilling i laksefjordsaka. Det er no klart at Førdefjorden blir nasjonal laksefjord, men grensa er flytta frå Flokenes til Ålesundet, ei mil lenger inn i fjorden.

– Dette er vi veldig godt nøgde med, seier saksordførar for saka, Torny Pedersen.

Ho har jobba lenge for å flytte denne grensa, og seier at ho er veldig glad for at ho til slutt fekk gjennomslag for dette.

– No får fire familiar i Flokenes halde fram oppdrettsverksemda si. Dette er viktige arbeidsplassar, og viktig for å hindre fråflytting. Dette vog til slutt tungt i vekstskåla, seier Pedersen.

Då regjeringa for ei tid tilbake la fram sin proposisjon, var grensa lagt ved Flokenes. På grunn av at dette allereie var eit kompromiss mellom regjeringspartia har det vore svært vanskeleg å få endra på det som låg der.

– Derfor er det ekstra gledeleg at vi no har fått flytta denne grensa, seier Pedersen.