- Strupen er den niande høgaste fossen i verda. Hadde dette vore klart då Jostedalsbreen nasjonalpark vart oppretta ville fossen truleg vore med i fredinga, heiter det i fylkesmannen sitt avslag på konsesjon til den planlagde utbygginga av Strupen kraftverk i Gloppen kommune.

Foreslår turistmål

Fylkesmiljøvernsjef Nils Erling Yndesdal foreslår jamvel at grunneigarane utnyttar fossen som ein turistattraksjon i staden.

- Det er få som nyt godt av det økonomiske utbytte frå småskala kraftutbygging i forhold til dei mange som må forholde seg til vassdraget og interesser knytt til dette elles når det gjeld turisme.

Dermed blir rådet frå fylkesmannen at det ikkje blir gitt konsesjon til bygging av Strupen kraftverk.

- Ikkje på lista

- Eg er litt forundra over at Fylkesmannen så ukritisk brukar turlaget sin argumentasjon og påstandar utan at han, slik eg les det, gjer sine eigne, seier Per Jarle Myklebust til NRK. Han er talsmann for dei ni grunneigarane som tener på bygginga.

- Eg synest han skal lytte til grunneigarane og. Myklebust legg ikkje mykje i rangeringa av fossen og seier til NRK at den ikkje eksisterer på nokon offisiell liste.