Saman med kameraten Frode Weum har Halvard Lunde starta selskapet Spilte Sjanser. Firmaet sitt første produkt er «Brannspillet», eit brettspel for to personar frå ti år og oppover. Ideen til spelet kom på ei seinvakt då dei to kjeda seg.

-Vi sulla med ideen om spelet ganske lenge. Etter kvart blei det svært tidkrevjande. Vi har designa det meste sjølv, og vi har til og med klistra på merka på brikkene for hand, fortel Lunde.

Spelet går ut på at cupheltane frå i fjor møter serieheltane frå 1963. Kvar spelarbrikke har personlege spelekort med eit utval eigenskapar. Kombinasjonen terningkast, individuelle ferdigheiter hos fotballspelarane og strategiske val hos brettspelaren, avgjer gangen i spelet. Ein må altså ikkje vere flink i fotball for å gjere det godt i Brannspillet.

-Den einaste fotballerfaringa eg sjølv har, er to treningar med Holmedal tidleg på 80-talet, fortel Lunde med eit smil.

Sjølv om han har budd mange år i Bergen, har han berre vore éin gong på Brann Stadion.

-Eg likar eigentleg ikkje fotball, men etter at vi har jobba med dette spelet, har eg begynt å skjøne litt, seier han.

Kompanjong Frode Weum er derimot Brann-fanatikar.

Karakterane til Brann-spelarane er henta frå spelarbørsen etter cupfinalen i fjor.

-Vi har justert spelarane litt i forhold til kvarandre, slik at spelet fungerer. Brannspelaren Erlend Hanstveit har gått over og vurdert karakterane. Vi har prøvd å vere sånn noko lunde rettferdige overfor spelarane, legg Lunde til.

Verre vart det då Lunde og Weum skulle karaktersette Brann-laget frå 1963.

-Når vi spør folk om kva kvalitetar dei forskjellige spelarane hadde, var dei sjølvsagt utruleg gode i alt. Dei er jo legender, smiler Lunde.

Lunde meiner Brannspillet passar heile familien.

-Bestefar hugsar Kniksen og co, dei unge hugsar fjorårets cupfinale. Dermed skulle den gode familie-feelingen vere der, seier Lunde med eit smil.

Han er sjølv godt nøgd med Brannspillet, men han reknar ikkje med å bli rik på det.

-Dersom vi er heldige, får vi dekt utgiftene vi har hatt. Likevel går det jo an å håpe at fleire klubbar skal få auga opp for spelet, slik at vi kan tilpasse det til både norske og utanlandske fotballag, seier Lunde.